کرنسی نوٹوں کی بندش کا اعلان

اگر آپ کے پاس سو پانچ سو، ہزار پانچ ہزار یا دیگر مالیت کے کرنسی نوٹ ہیں تو آپ کی اطلاع کے لیے عرض ہے کہ عنقریب یہ نوٹ بند ہو جائیں گے۔ آپ سے التماس ہے کہ یا تو یہ نوٹ اپنے استعمال میں لے لیجے یا اس کو بدلوا کر وہ کرنسی لے لیجے جو آگے چلے گی۔

مقررہ وقت گزرنے کے بعد ان کرنسی نوٹوں کی وقعت سادہ کاغذ کے برابر بھی نہیں رہے گی۔ پھر یہ آپ کے کسی کام نہیں آ سکیں گے اور آپ سوچیں گے کہ کاش میں یہ نوٹ بدلوا کر موجودہ کرنسی لے لیتا۔

وقت کا کچھ پتہ نہیں، نہیں معلوم کب میری یا آپ کی آنکھیں بند ہو جائیں۔ اگلے جہان میں نیکی کا سِکّہ چلے گا۔ یہ نوٹ ہمارے ساتھ وہاں نہیں جاسکیں گے۔ اگر آپ کسی کو کہہ سُن کر یہ نوٹ اپنی لحد میں رکھوا بھی دیں، تب بھی وہاں ان کی کوئی اہمیت اور وقعت نہیں ہوگی۔

اس لیے بہتر ہے کہ آپ ان نوٹوں کی بندش سے پہلے پہلے انہیں اپنے اوپر خرچ کرلیں، اپنے اہل و عیال پر خرچ کریں۔ اور اُن پر خرچ کریں جنہیں اس وقت ضرورت ہے۔ اگر آپ اُس طریقے سے اِن نوٹوں کو خرچ کریں گے جو مجھے اور آپ کو بتایا سکھایا گیا ہے تو آپ کی یہ کرنسی اگلے جہان کی کرنسی میں ایکسچینج ہو جائے گی۔

کفن میں تو جیب نہیں ہوتی لیکن اس طریقے پر عمل کرکے آپ وہاں پہنچنے پر بھی مالدار ہوں گے کہ باقیات تو بس صالحات ہی ہیں۔

جس نے ہمیں یہ رزق دیا ہے اسے خرچ کرتے وقت ہمیں اس کی مرضی کو اور منشاء کو نظر انداز نہیں کرنا چاہیے۔

******